IRAQ FOR EVER http://abdullasami.maktoobblog.com Wed, 05 Apr 2006 13:54:00 +0000 http://wordpress.org/?v=2.6.5 en حسون الدنماركي http://abdullasami.maktoobblog.com/27764/%d8%ad%d8%b3%d9%88%d9%86-%d8%a7%d9%84%d8%af%d9%86%d9%85%d8%a7%d8%b1%d9%83%d9%8a/ http://abdullasami.maktoobblog.com/27764/%d8%ad%d8%b3%d9%88%d9%86-%d8%a7%d9%84%d8%af%d9%86%d9%85%d8%a7%d8%b1%d9%83%d9%8a/#comments Wed, 05 Apr 2006 13:54:00 +0000 ABDULLA ALIRAQI http://abdullasami.maktoobblog.com/27764/%d8%ad%d8%b3%d9%88%d9%86-%d8%a7%d9%84%d8%af%d9%86%d9%85%d8%a7%d8%b1%d9%83%d9%8a/  
تتذكرون حسون الدنماركي ، مرة حجيتلكم عنه من اجا للعراق ، اشو هذا هم رجع انوب ،اني مو وصيتكم اخوانا بالدنمارك وكلتلكم لتخلوا يجي ، ليش تيهتوا يمعودين ترى هذا فضيحة مينطلع بيه ، بسرعة  خلي واحد منكم يجي ياخذه ، ترى راح ابتلي بيه .تعالوله خبص الدنيا احنا عايزين قلق صارله جم يوم شلشنا ، طريقنا منندله ،وحتى العملية السياسية راح تخرب من ورا ، وين رئيس حكومة الدنمارك وين جلالة الملكة خل تسمعني ، موعايفة  الدنماركيين دايحين بالشوارع واحنا مبتلين . الله يخيليكم تعالوا اخذوا ، عمي منريده ، لانعرفه ولايعرفنا ، جايبله كاميرا فديوا وتعالوا صوروني بالمراجيح استعيد طفولتي، صعد بالمرجوحة واني اصور والجهال تضحك علينا ، تعالوا صورولي بيت صاحبتي استعيد مراهقتي ، وهو اكبر جذاب سعيدة لا صاحبته ولاتعرفه وين الله خالقة ، ابتلت البنية بي بلوة ، فضحها فضيحة ، مرة متزوجة وعدها جهال ورجلها بجيش المهدي واذا يلكفه يشوي على اذانه بصل .
لا وفوكاها جايني تعال وياي صورني يم الهمر الامريكية ، عبالة الهمر عربانة عمة شبوط الله يرحمه ، هاي شلون مصيبة . انوب يتعيقل علينا ، هاي ليش سواق التكسي يطوطون ، انتو شعب متخلف ،هاي شنو الزبالة انتو شعب وصخ ، هاي ملابسكم عتيكة من البالات ، ليش متفرجون سنونكم ، هسه شعدنا روضة خومو روضة . عمي احنا متخلفين شجابك علينة .روح لكوبنهاكن شتسوي هنا.
والله ايام العيد كلها ما خلاني اشوف طريقي ، شلش تعال وياي للسوك، شلش تعال يمي ضجت ، شلش اشتريلي كاسيت خضير هادي ، شلش جيبلي اغاني ردح في ردح و طربكة، شلش وديني للسدة ارد اسكر هناك، شلش مشتهي فشافيش، شلش تعال نصور الفلوجة واللطيفية للذكرى ،هسة كلها نكول ميخالف ولد متغرب ومحروم ، بس مال شلش تعال دليني على مكتب  اياد علاوي اسلم عليه هاي موخوش حجاية ، يريد يورطني ويا الجماعة . والله بس يسمعون بيّه رايح للوفاق ثاني يوم انطرد من الشغل  ،اخوان يستر عليكم وعلى الدنمارك ، تعالوا اخذوا ابنكم ترى بعد ما اتحمل . لابسله  قبوط اسود ولفاف اسود ونظارات سود وجفوف سود وجنه زرزور ، يركض مثل المرعوص  واني اركض ورا ، اصور بي والناس تصوفر وتصيح علي : ودددددديييي ، هسة هاي وين جانتلي ، انوب عزمته بمطعم الغوطة ارقى مطعم ببغداد  ، يكلي مشتهي شلغم . صدك المعيدي يبقى معيدي يروح يروح ويرجع عل الشلغم . وبالاخير كبل ميسافر اكيد راح يتداين مني ،والله شنو، ماعدي عراقي من اصرف اطيك ، ومثل ذيج المرة يفلت ومحد يدري بيه ،
البارحة تعارك وي الحرس الوطني يكلهم لازم تحترمون الناس وتكولون للمواطن سيدي  ، وبعدين طلع الجواز وكلهم اني دانماركي ، هسة همة نصهم ميقرون وما سامعين حتى بطوزخرماتو ، يا دنمارك يا بطيخ ، ولله لو مو الضابط ابن اوادم جان هسة حسون شامريه جوا
اخوتي  الدنماركيين بعد يومين، اذا محد يجي منكم ياخذه ، بشرفي اسلمه لقوات حفظ النظام . وكلهم هذا من اهل الدورة ويفتر بالليل بالثورة .
متعلمله جم كلمة وجاي يفييك علينا . كل شوية وطكني بجملة : تيك ات ايزي شلش . . . ذبحني ، موتني ، الله يساعد الدنمارك عليه  .
اليوم الصبح دك علي الباب
* ها حسون شتريد
* تعال وياي
* وين ؟
* للمحكمة
* شتسوي بالمحكمة يمشخوط ؟
* ارفع قضية على حجي كامل يكلي انت جنت مطيرجي وسخ ونكري
* روح نام حسون ، يا محكمة المصخمة هاي . بعدين  انت صدك  جنت مطيرجي ليش مستحي .
* تبقون متخلفين وماعدكم كرامة ، احنا بالدنمارك هيج شتيمة ناخذ عليها تعويض مادي ومعنوي ،اخي الكرامة فوق كل شيء والانسا…..
حسون روح اريد اكتب مقالتي  .
 
 
]]> http://abdullasami.maktoobblog.com/27764/%d8%ad%d8%b3%d9%88%d9%86-%d8%a7%d9%84%d8%af%d9%86%d9%85%d8%a7%d8%b1%d9%83%d9%8a/feed/ احلام تتحقق http://abdullasami.maktoobblog.com/27762/%d8%a7%d8%ad%d9%84%d8%a7%d9%85-%d8%aa%d8%aa%d8%ad%d9%82%d9%82/ http://abdullasami.maktoobblog.com/27762/%d8%a7%d8%ad%d9%84%d8%a7%d9%85-%d8%aa%d8%aa%d8%ad%d9%82%d9%82/#comments Wed, 05 Apr 2006 13:49:00 +0000 ABDULLA ALIRAQI http://abdullasami.maktoobblog.com/27762/%d8%a7%d8%ad%d9%84%d8%a7%d9%85-%d8%aa%d8%aa%d8%ad%d9%82%d9%82/ كتابات - شلش العراقي
 
 انا شخصيا احب البنات بشعر طويل وتنورة قصيرة بشرط ان يكونا مجتمعين، يعني ما احب وحده شعرها قصير ولابسه تنورة قصيرة او العكس شعرها طويل و تنورتها  هم طويلة.
وشخصيا اكره  الرجال بلحية طويلة ودشداشة قصيرة وليس شرطا ان يكونا مجتمعين، فاحيانا احب اللحية الطويلة للعبقريات الكبيرة واكره الدشداشة القصيرة عندما يضطر عليها الفقراء..
في حياتي الجامعية كنت اندفع غريزيا لاي شعرطويل يرفرف  فوق تنورة قصيرة ،وكنت غريزيا الوذ بالهرب من اية لحية من تلك التي فصلت لتناسب الدشاديش القصيرة,,
في الحملة الايمانية التي دشنّها الخليفة التاسع والستون صدام الملعون..طالت تدريجيا التنورات وانحسرت تدريجيا الدشاديش ،واختفى تدريجيا الشعر تحت الحجاب وانطلقت  تدريجيا اللحى من جحورها في هجوم حوّل الجامعة من ممرات ورود الى مزابل لحى..
اختفى الخليفة  في حفرة واختفت معه  التنانير القصيرة وكذلك الدشاديش القصيرة ..
الاولى صرت لا اراها إلا في التلفزيون ، والثانية  صرت لا اراها  الا في الكوابيس التي تطاردني في كل شارع ومطعم ومقهى ..
قبل يومين حلمت انني اتمشى فوق جسر الجمهورية بصحبة فتاة بتنورة قصيرة وبشعر مجنون يتطاير على كتفيها,,في الصباح توجهت الى الباب الشرقي ومن هناك الى منطقة الدورة حيث محل عملي .وبعد ان بعت( القاسمة الله) وفي طريق العودة ، قررت ان استأجر تكسي لان الامور (شوية  عدلة والحمد لله)، اوقفت سيارة تكسي ووجدت نفسي في ورطة ، لقد تحقق حلمي تماما .
كان السائق ( لحية طويلة بدشاشة مختصرة جدا جدا يعني صاحبها مقرر اليوم فطورة  بالجنة ما بيها مجال..الكارثة هي انه وافق دون تردد على الذهاب الى الثورة..)
من المؤكد انني  لايمكن نقل كافة مشاعري التي عشتها من لحظة صعود السيارة .
 قلت مع نفسي وانا ارتجف رعبا  ماهذه (الهــــــــــّدية )التي اخذتها الى اهل الثورة المساكين؟ الذين لم يجنوا من امثالي سوى النقد اللاذع والسخرية والتعليق على الصغيرة والكبيرة دونما فائدة حقيقية ،واخيرا (جايبلهم رفيق استشهادي مضبوط وانشا الله كَبــــل بنص سوك مريدي,,)
هل اقول له : من فضلك غيرت رايي  ممكن توديني للمنصور .او  للجادرية ؟  لا ادري ؟ ربما سيرتاب مني ويفجر السيارة فورا ،وانا اريد ان اشم الهواء قليلا .الحياة عزيزة لا اريد ان اموت في هذه الدقائق بالذات .ياالهي لماذا بهذ السرعة تتحق احلامي ؟اين التنورة القصيرة اين الشعر الطويل؟
الرجل( والشهادة لله) كان يكلّم نفسه كثيرا ،وربما يتلو اشياء تخص مرحلة  ما قبل بلوغ الجنة..وكان هادئا لاينزعج من الازدحامات التي يمر بها ،كما كان يتجاهلني فلم يسألني على عادة سواقنا في اسألتهم المعروفة
* اني شايفك.. وين تشتغل؟ ..انت مو اخو فاضل؟.. بيتكم بالشركة لو بالكيارة ؟ لوهيج رايح بشغل؟   الى اخره من اسئلة السواق..
عندما وصلنا كرادة مريم التفتَ اليَّ الرجل وسألني بهــــــــــدوء
* اخي بارك الله فيك وين كتلي تريد توصل ؟  لقد نسي الرجل او انه لم يسمع جيدا او ان الموضوع لايعنيه اصلا !!!
قفزت الي فكرة عبقرية وقلت له:
* وياك اخوية
* نعـــــــــم ؟!!
* وياك وين متروح
ارتبك الرجل من اجابتي
* اخي ما افتهمك ،اعبر الجسرعلى بركة الله  لو لا ؟؟؟
* اعبر عيني اعبر.
* زين وبعدين وين نتجه انشاء الله ؟!!
* بكيفك اخي .
* شنو بكيفك ؟
* اخوية انت تندل طريق الجنة مو اني.
* ها شبيك اخي؟
* ما كو شي وداعتك.  تمتمت بهلع وانطلقت دموعي بغزارة..
 
 ارتبك الرجل كثيرا وتلفت يمنة ويسرة ثم اسرع بسيارته  عابرا جسر الجمهورية متجاهلا توسلاتي ونحيبي، وعندما وصلنا ساحة الطيران استدار بجنون  نحو مسطر العمال المساكين..
 
((((بـُــــــــــــــــــمممممممم)))))
 
انفجرت السيارة بشدة مهولة وتطاير كل شيء في الهواء .
 
بعد لحظات ..انا وثمانية عمال بناء ، على اصوات موسيقى ملائكية نتناول فطورا شهيا في جنات الخلد .. بهدوء وسكينة وراحة وسعادة وحوريات (احداهن بتنورة قصيرة)..طيور وملائكة وورود وهناء ابدي.. انها الجنة ياالـــــــــــــــــــــــهي …
 
في هذا الوقت كانت  جهنم  تمور  قريبا منا وهي تشوي وجبة جديدة من اصحاب الدشاديش القصيرة واللحى الكثة ومن بينهم سائقنا الورد الذي نسيت ان اعطيه اجرته.
صارت رائحة الشواء تزكم انوفنا فقررنا نحن الشهداء ان نمضي بعيدا في الاعماق ..احد العمــــــــــــال الشهداء  ظهر انه من قطاعنا ،تعــــــــــرف عليّ وقال:
* شكرا شلش ، اول مرة تسوي شي زين بحياتك .
 
 
]]> http://abdullasami.maktoobblog.com/27762/%d8%a7%d8%ad%d9%84%d8%a7%d9%85-%d8%aa%d8%aa%d8%ad%d9%82%d9%82/feed/ SHALASH 3 http://abdullasami.maktoobblog.com/27760/shalash-3/ http://abdullasami.maktoobblog.com/27760/shalash-3/#comments Wed, 05 Apr 2006 13:45:00 +0000 ABDULLA ALIRAQI http://abdullasami.maktoobblog.com/27760/shalash-3/ كتابات - شلش العراقي
بدأت حكاية جابر ومهدي في عام 1982 ،عندما اصرّ الرفيق جابر  المسئول البعثي في احـــــــــــد قطاعات مدينة الثورة على انتزاع مهــدي من بين امه واختيه اليتيمتين،  والحاقه في قاطع الجيش الشعبي للمساهمة في الحرب ضد العدو (الايراني المجوسي)،
 حاول مهدي التملص طويلا عبر تغيير مواعيد خروجه من البيت ، وكذلك تغيير مسارات طريقــــه الى العمل في "مخبز صمون الجوادين " ، القريب من منطقه سكناه ،  ولكنه وقع  اخيـــراً في الفخ ، ففي ساعــة مبكرة من الصباح وعندما كان مهدي في طريقه الى المخبز استطاع جابر ان يصطاده ويحشره في سيارة القاطع ،
لم تنفع توسلات مهدي ودموعه في تليين قلب الرفيق جابر ورفاقه ، وعندما يأس من ذلك ، اكتفى فقط بأن يعطى فرصة لابلاغ امه المريضة ،  التي ليس لها من معيل سواه ، لكن الحـــــــــــــــزب علّّم جابر ان يصغي للمباديء فقط .
انطلقت السيّارة ووجد مهدي نفسه بعد ساعات في معسكر تدريب بعيدا عن قلب امه الملهوف ، والتي انتظرته بدورها في باب البيت حتى ساعة متأخرة ، لتتأكد  بعد ذلك من انه وقع في قبضة الرفيق جابر.((هذا الخفت منه طحت بيه)) قالت لنفسها وبكت بحرقة .
في صباح اليوم التالي ، نادت على فاطمة ابنتها الكبيرة لتدلها على بيت الرفيق  ، والذي يسمى (بيت المسئول).
 بيدٍ ذليلة طرقت الباب وخرج المسئول (جابر) وبلباقة شرح لها ان الوطن يحتاج الرجال ، وانه وانطلاقا من احترامه لجيرة العمر ، سوف يوصي بمهدي  خيرا،( وهي  كم شهر وتخلص..)
وعندما شرحت له ام مهدي وسط نشيجها ظروفهم المعاشية الصعبة (كفيلك العباس ما عنده لكَمة خبز)، اجاب الرفيق جابر (ان البلد يمر بمرحلة تاريخية  عصيبة وعلينا ان نضحي بالغالي والنـــــــفيس لعيون العراق وابو عــــــــــداي …. الزلم المن تراد)
وفي اول هجوم وجد نفسه فيه ، وقع مهدي في الاسر ، حيث معركة (الشوش )الشهيرة,وفي معسكر على الحدود ( الايرانية السوفيتية)، عاش سنوات شبابه اسيرا تحت ابشع انواع  العذاب الانساني (( كنا نأكل القليل من الارز والقليل من الخبز ولا نأكل اللحم ابدا ولم تكن لدينا احذية وكان الطقس جليديا في الشتاء. وكانت سماكة الثلج تبلغ مترا وكنا نحاول شق طريقنا وسط الثلوج بواسطة صحوننا ولم نكن نسمع اية اخبار عن العالم الخارجي وفوق هذا كان ….!!!)) حسب ماكان يروي مهدي بعد عودته من الاسر.
في عام 1987 حدث مالم يكن في الحسبان  حتى ولا في الكوابيس ، حيث وخلال زيارة احـــد اعضاء المجلس الاعلى للثورة الاسلامية  لمعسكرات الاسر لالقاء محاضرة دينية ، وهو رجل مععم اسمه السيد فاضل ، ويعد من المقربين الى عائلة الحكيم ، التي تملك المجلس .كان برفقة رجل الدين هذا اربعة مرافقين وكان الرفيق جابر في مقدمتهم ,نعم (الرفيق جابر) الذي وقع في الاسر ايضاً في عام 1985 واعلن توبته ، وصار من التوابين الذين شكلوا فيلق بــــــــــــــــدر..
اصيب مهدي بالدّوار وهو يرى ان السماء سلطت عليه( جابر) في الوطن وهاهي ترسله اليه في هذا المكان المنسي من العالم ..ماهذا الذي يحدث ياالهي !! قال مهدي وعينه تتجه الى السماء ،
اقترب الرفيق جابر من مهدي بعد ان تعرف عليه وقال له :
• ان الله ارسلني رحمة اليك ..اه يامهدي .. كم تغيرت وعلا الشيب راسك ماهذا الشبح الذي اراه ؟ هل حقا انت مهدي جار العمر؟ ولكن لاتيأس ان الله لن ينساك ، تعال سأسجل اسمك مع التوّابين لتكون واحدا من ابناء فيلق بدر الابطال،وتحت راية الامام الخميني دام الله ظله الوارف ، سنحرر العراق من الطاغية الكافر صدّام لعنه الله
حدق مهدي في لحية جابر الطويلة ، وهيأته الجديدة ، واستعاد في رأسه شكل هذا الذئب يوم كان يتحدث باسم المباديْ  وقادسية صدّام ، تحت راية  بطل التحرير القومي الرفيق المناضل صدّام حسين (حفظه الله ورعاه)
استجمع قواه وقال :
• اسمع يارفيق جابر .. مو انت الجبتني لهنا، مو انت  الهجمت بيتي ..بعد شتريد لاحكني ؟مو كافي حرمت امي من شوفتي وخليت خواتي وحدهن؟ ..ميخالف روح اني مسامحك على كل هذا …بس اذا تريد تسويني خائن  تره لا اني ولا الله راح نسامحك ..هاي تاليها تريد تشغلني عميل .لك انت من يا ملة ؟!  هناك مسئول وهنا مسئول متكَلي انت شنو؟
ابتسم جابر ورد بهدؤ على فريسته المسكين ،
• اسمع يا مهدي انت ميفيد وياك وانت الظاهر  صدكت نفسك.. وبعدين لازم تعرف اني شخصية قيـــــــــــــادية ، اذا هنا واذا هناك واذا بالمريخ ، الله خالقني قيادي شسوي موبيدي ,,راح اطيك اسبوع تفكر وراها راح تعرف شسوي بيك  ،يابعثي ياكافر ياقذر..  مهدي مسك اعصابه واجّل تفلة كانت تلح عليه بالانفلات ,ادار وجهه عن هذا العميل الوضيع وانصرف الى القفص والدموع تمطر من عينيه .
بعد اسبوع صار الرفيق جابر يقيم حفلات تعذيب يوميّة لمهدي الصدّامي كما يسميه , حفلات تعذيب لم يستطع مهدي ان يرويها بالتفصيل ، لانه ما أن يتذكرها حتى تغرورق عيناه بالدموع الغزيرة  ويشحب وجهه وترتفع درجة حرارته ، ومن ثم يتصبب عرقا ويشيح بوجهه عن الاخرين,,
مرت الايام وانتهت الحرب وعاد مهدي ليجد أمه قد انتقلت الى السماء  بعد ان فقدت بصرها حزنا على فراقه ، وان اختيه النحيلتين تعيشان على صدقات الجيران ومعونات الاقارب .. توكل على الله وبدأ حياته من جديد في سنوات الحصار البشعة بالعمل في مخبز للصمون….دارت الايام وسقط نظام  صدام واضطربت الاحوال ….
اليوم وفي مركز الاستفتاء على الدستور  ،حيث قرر مهدي بالتصويت بنعم .  ببنيته الشائخة قبل الاوان وبظهر مقوّس وبخطى مرتبكة دخل المركز متوجها الى موظفي السجل ، فجأة وقعت عيناه على عينــــــي جابر الذي يراقب مع مجموعة من  اصحاب الخواتم واللحى البدريين مركز الاستفتاء..صعق وارتبكت روحه وكاد ان يسقط على الارض عندما ناداه جابر بصوت عال ..
• مهـــــــــــدي .لك انت مو مهدي هاي  شجابك
بنعم  شبه ميتة اجاب مهدي  وكاد من حشرجتها لايسمعها هو شخصيا ,,
• شراح تصوت يا بعثي؟ ساله جابر
• نعم .. ساصوت بنعم واذا تحب اكتبها انت بيديك..
اّه يا مهدي البعثي .. لماذا رفضت التوبة وتعفنت في الاقفاص ،لماذا لم تصدقني عندما اخبرتك بانني قائد بالفطرة  وانت  حشرة مجرد حشرة لاتعرف رأسها من رجليها؟؟ حدق مهدي في وجه جلاده الابدي  :
• انت خائن  .. انت خائن بالفطرة ايها الرفيق.. قال  مهدي هذه الجملة واختفى ….!!
 
 
 
]]> http://abdullasami.maktoobblog.com/27760/shalash-3/feed/ SHLASH 2 http://abdullasami.maktoobblog.com/27758/shlash-2/ http://abdullasami.maktoobblog.com/27758/shlash-2/#comments Wed, 05 Apr 2006 13:41:00 +0000 ABDULLA ALIRAQI http://abdullasami.maktoobblog.com/27758/shlash-2/ لتوقف دوري كرة القدم العراقي، باعتقادي أثر مهم في تكتل الناس حول مقتدى الصدر او الحكيم او غيرهم من عظماء زماننا,حيث بدل التناحر اللفظي حول (الشرطة والجوية والزوراء والطلبة) وأيهما الافضل في المستطيل الاخضر، راح المشجعون بالغريزة يتعصبون الى فرق جديدة تلعب على المستطيل الاسود. لدينا جماهير لديها كمية كامنة من الطاقة الهتافية ، ليس لديها سوى التشجيع والهتاف والصريخ والزعيق وعاش ويسقط وبالروح بالدم.
توقف الدوري او ضعف اثره تقريبا ، فاندفعت هذه الحشود الى تصريف حماسها وتشجيعها على فعاليات جيش المهدي، وتجمعات التيارالصدري والزيارات الشعبانية وغيرها.اعلام وهتافات وهوسات وعراضات وكتابات على الجدران .
ومثلما هو غير معروف الدافع الاساسي للانحياز لفريق كروي دون سواه ,والتعصب له بطريقة هستيرية تقرنه بالكرامة والشرف والكبرياء احيانا ,يتعصب الناس هنا الى ميليشيات واحزاب تلتف بشكل عام حول رمز ساذج وسطحي وليس لديه ادنى قدر من روح القيادة والكاريزما التي تؤهلة الى قيادة صخلتين كما يقول اهلنا..واغلب الاحيان يكون هذا الرمز كريهاً وشريراً وتعلن سيماؤه عن ملامح اجرامية دموية   (مقتدى ،الحكيم،الحسني الصرخي وسواهم وجوه مشبوهة )
سيكلوجيا الجماهير أمر جرى فحصه في كثير من النظريات الاجتماعية, وكذلك سيكولوجية المشجعين في الملاعب، امراً لم يفت علماء الاجتماع، فافردوا له المؤلفات المهمة التي تقف عند مفاصل حيوية لتفسير حالات هستيريا التشجيع .لكن هناك اسئلة كثيرة ظلت دون اجابة من مثل:
-لماذ يشجع سالم دعيّر فريق برشلونه بشكل أعمى وجنوني حتى أصبح أسمه بين الناس سالم برشلونة؟
ما علاقة سالم ابن الثورة- جوادر- ببرشلونة؟ لماذا يرتعد ويهتز غضبا اذا احدهم هتف باسم ريال مدريد امامه؟، ثم هذا الاخير لماذا يهتف باسم ريال مدريد؟ من المؤكد انهما كلاهما لم يسافرا الى اسبانيا ولم يلتقيا نجوم ومدربي الفريقين، ولم تكن لهما حبيبات من برشلونة أو من مدريد, لكن سالم مستعد أن يكول عليك هذا وهابي ارهابي سلفي تكفيري و بعثي مفخخ اذا شعر حقا انك تستخف ببرشلونة.
سالم والالاف أمثاله غير مضرّين اذا ما انحسر ولاؤهم لميلانو وريال مدريد وبرشلونة ومانشستر وسواها من الفرق العالميّة والمحليّة، لكن الكارثة تبدأ عندما ينتقل هذا الى تشجيع العمائم السوداء واللعب بالوطن( ككرة) والهتاف باسماء لابسي هذه العمائم  دون دراية او معرفة حقيقة بنواياها ودوافعها سوى انها من أبناء المرجعيات السابقة، كما لو ان العراق دارحضانة ابناء المرجعيات وان ميراثهم الشرعي هو الوطن كله  ،.ربما هي عقدة الحسين اليتيم (ابن رسول الله) الذي قطعته سيوف اجدادنا ارباً اًرباً نقدمها الان لابناء الحسين الايتام.. .. ربما
,وفي الواقع نحن الايتام والمساكين واشكالنا من الهم والقهر صارت بنغاّلية.بينما وجوههم حمرة ومتفحة وخدودهم رمان هؤلاء الايتام المشوهين المنغوليين.
أمس شاهدت صبيان في عمر المراهقة، محشوون في باصات عتيقة (دك النجف) يرفعون أعلاماً عتيقة ويرددون شعاراتٍ سخيفة ك(عّجل فرجه وانصر ولده) وسواها, ضننتهم في البداية متوجهون الى ملعب الشعب الدولي، واذا بهم ينطلقون نحو الكوفة حيث قيل لهم ان السيد القائد مقتدى سيحظر شخصيا لالقاء خطبة الجمعة في مسجد الامام علي( ع).
نفس الرعاع والدهماء الذين دمروا أعصاب الامام علي  كبل اكثر من الف واربعميت سنة راحوا اليوم الى الكوفة ولحسن الحظ انهم اليوم سيلاقون رجلا  لايقل عنهم امية وجهل ورعونة يقول انه حفيد الامام علي.
خنجر لم يتركني لحالي معذبا لما اراه من ابناء مدينتي، طرق علىّ الباب وهو يضع كفنا ابيض على كتفه ويحمل كفناً اخر قدمه لي وهي يكرر: خو اخوك مانساك يالله البس كفنك وهاي السيارة طابكَة خل نروح للكوفة.(تخيلوا هذا البعير مصبّح عليّ بجفن …ابن ال….)
من شفت خنجر بكفنه الابيض جنة سوبرمان بطني طكَت من الضحك و لو ما خفت ليكول تضحك على كفن السيد الصدر جان تمرغلت بالتراب من الضحك، كوة سيّطرت على نفسي….
كلته رفيق خنجر بروح ابوك روح اسمع الخطبة وتعال احجيلياها.بصراحة خطب السيد القائد صعبة عليّ و ما افتهمها.ّ
خنجر صفن شوية وكلي: لك خاف انت تصلي وية جماعة الحكيم بجامع( براثا)
لا بشرفي خنجر، الحكيم وقندرتك .بس اني اليوم مشغول، الجمعة الجاية اجي وياك للكوفة
 انقلع خنجر وهو يردد: انت  بكيفك بس راح اتفوتك خطبة السّيد
,طبكت الباب بكل قوتي وصرخت دون ان امسك اعصابي
اي درووووووووووح انعل ابوك لابو حتى الس………….. لابو ساعة السودة.
 
 
 
* هتاف يردده مشجعوا نادي الشرطة نكاية بنادي القوة الجوية
 
 
]]> http://abdullasami.maktoobblog.com/27758/shlash-2/feed/ SHALAH http://abdullasami.maktoobblog.com/27755/shalah/ http://abdullasami.maktoobblog.com/27755/shalah/#comments Wed, 05 Apr 2006 13:29:00 +0000 ABDULLA ALIRAQI http://abdullasami.maktoobblog.com/27755/shalah/ كتابات - شلش العراقي
 
ها أخوان مو كتلكم راح تصير بالنعل  ، شفتوا الديمقراطية شكد حلوة والشعب يعبر بالطريقة المناسبة عن أراءه ..حتى لو جانت هاي الطريقة هي الاسلحة الشحاطية  واللاستيكية  ،شفتوا إخوانا أبناء الفالة والمكوار شلون بيضوا وجوهنا ، عاشت أيدهم .
أكللكم  إحنا شعب ديمقراطي بالفطرة متصدكون ،إحنا شعب يموت على الديمقراطية متصدكون ، أخوان اكلكم إحنا بلد كامل أتهدم فوك روسنا وتفرهد بيومين  من اجل شوية ديمقراطية وعراق جديد هم متصدكون.
منذ  مئات السنين ، ومن جانت كل طيور العالم بريّة ومتوحشة ومفترسة كانت طيور ايمتنا طيور الحضرة الشريفة، أليفة وتفتر بالصحن براحتها ، وجميعكم - اقصد اخواني الشيعة البررة تحديدا - تتذكرون من جنه  جهال ونروح للزيارة وية امهاتنا وجداتنا ، جنه نبجي نريد نلزم طيور الحضرة وأمهاتنا يصيحن :
* ولك لا اكعد راحة  ,
* يمة ليش خليني اكضهن
* يمة هاي طيور الحضرة محروسة بالإمام لا تعم علينا
بهاي الأيام ، أيام العراق الاسود المعمم ، هاجرت طيور الحضرة من الخوف وصار ضريح الإمام مصيدة مغفلين ,بس يطب واحد من غير قائمة  رأسا تطلع القامات والسجاجين  والأسلحة الشحاطية اللاستيكية والطكاكيات العتيكة  .
ديمقراطية …  والمنافسة القندرية الشريفة مسموحة ومكفولة دستوريا .وبعدين تربية النعل مو جديدة على الجماعة .وكلكم تتذكرون حادثة التراشق الشهيرة  اللي حصلت بيناتهم بالجمهورية الاسلامية قبل ست سنوات "من آية الله الجان هناك شتم آية الله الجان  هنا ، فأتباع الجان هنا اللي جانوا هناك نزعوا الاسلحة الشحاطية والطكاكية اللاستيكية صناعة هناك وضربوا بيها آية الله الجان هناك .تاهت عليكم لو واضحة أخوان ؟ وإذا واحد منكم ما أفتهم يرفع أيده  "
اخاف أحجي  وعليّ الناس يكلون ….
شحجي ؟ مو آني ألف مرة بالتلفزيون شفت بطل التحرير القومي سابقا ، والمسجون بدعوى فتح الكيزر بالصيف على اهل الدجيل حاليا. آني بعيني شايفه بالنجف الاشرف يصعد فوق قمارة سيارته على طولة ويحيي الجماهير المحتشدة التي جاءت لتحية سيادته معلنة ولاءها المطلق وحناجرها تصدح بالدعاء لسيادته حفظه الله . خو هاي مو قبل مليون سنة .كلها جم سنة قبل السقوط ، وهي نفس الوجوه ولابسة نفس النعل ، جانت حاضرة لاستقبال القائد الذي شق طريقه بصعوبة بين أبناء شعبه .شو محد  صار اخو اخيته وسحب شحاطته من حزامه ونتف بيها القائد؟  ، ليش ؟ ها اكو واحد يصير رجال ويكلي ليش ؟
وماعندي شك  من أن  الذين كانوا يتراقصون أمام القائد كالقردة هم أنفسهم  قتلة الخوئي ومرتكبي جريمة أمس التي لم تتم فصولها كاملة .  يضاف اليهم عن الحلال والحرام شوية اشقاء  من دول الجوار الجغرافي على حد تعبير ملا ابراهيم .
انا هنا لا الغي حق الناس بالتظاهر والاحتجاج على السياسين و لاادافع عن احد كائنا من يكون ، هذا حق مشروع بل واجب ، لكن مو بالنعل اخوان ، شنو قضيتكم ؟ هسة لتحترمون زوار الامام احترموا الامام ، عيب ، استحوا شوية تضلون لعبة بيد هذا وذاك.اهانة مرشح بهاي الطريقة  هي اهانة لمنتخبيه ، صيروا مثلي كعدوا وانتقدوا وشتموا براحتكم . اهوووو اني ويامن احجي اذا سلمان الاطرش يكلي حيل بعلاوي ،"انت قريت قائمته ، كلها ضد الشيعة "،  والمصيبة  ان سلمان لا يقرا ولايكتب ولايسمع وماعدهم مولدة حتى يشوف شكو ماكو .
بالله شلون وياكم ، انتم تخلون الناس تشتغل لولا , ميصير هيج ، تقبلون واحد يكوم ويضرب صاحبكم بقندرة عتيكة ؟ احجو . . . تقبلون ؟.
الانتخابات معركة تتم عبر رمي الاوراق في الصناديق، وليس اطلاق الكيوات عابرة القارات وقريبا من مرقد امام الحق والشهادة ..
اخوان اللي يؤمن بديمقراطية الكلاشات والكلاشنات والكشائد  والنعل والشحاطات هذا لو ميعرف شنو القضية ، لو جاي يخرب القضية،  وحدة منهن ، هذا مو سياسي ، خل يكعد بيتهم يرتاح ويريح الناس .لوياخذ جوالاته ويرجع  لعمامة .الله يخليكم ذبحوها على قبلة ، ترى لعبتوا نفسنا وسويتوها بلية ملح ،و فضحتونا وشهرتونا .وحتى العراق صار مدري شلونه .
انتخبوا قائمة : كَيوة ، كَيوة ، كَيوة
 
 
 
]]> http://abdullasami.maktoobblog.com/27755/shalah/feed/ SHALASH ALIRAQI http://abdullasami.maktoobblog.com/27753/shalash-aliraqi/ http://abdullasami.maktoobblog.com/27753/shalash-aliraqi/#comments Wed, 05 Apr 2006 13:25:00 +0000 ABDULLA ALIRAQI http://abdullasami.maktoobblog.com/27753/shalash-aliraqi/ كتابات - شلش العراقي
 
ها شفتو نور شسوه ، صد ضربتين جزاء وسجل وحدة . هذا الشغل . والله نور شريف ، فرحني واني جنت ضايج ، نور شريف . بس نسيت اسال نور شيعي لو سني؟ . اي من حقي اسال ، لان خلصت عشرين سنة اشجع احمد راضي، وبالاخير طلع سني .سني ومرشح وية ابو سدارة ، طلع احمد راضي موبس مراوغ بالمستطيل الاخضر ،طلع مراوغ حتى بالمثلث السني ، مع الاسف ، ياما غبت من المدرسة، ياما صيحت بملعب الشعب ،وبعدين طلع احمد راضي سني . يالله شكو بيها السنة هم " اخوانا ".
بشرفكم نور والشباب الحلوين صورهم مو احلى من هاي الصور التراسة شارعنا ،احجو الحق رجاء ، مو حتى جهالنا اخترعت من هاي الشكول وكامت تخاف تطلع بالشارع.
تطلع باب البيت صور ، تروح للشارع صور، توكف بالركن صور . التلفزيون صور صور.. صور . حتى الدنيا كامت تمطر صور .
اذا هلكد عدنا ورق  جا ليش توزعون مناهج قديمة للطلبة ؟ صيروا شوية شرفاء واطبعوا مناهج جديدة للطلاب . وفوك الصور انوب  لافتات . يابوية شكد لافتات ، والله قماش اللافتات يكفي الثورة ملابس داخلية لعشر سنوات اذا مو اكثر .
انتخبوا القوي الامين . انتخبوا الاصلع السمين . انتخبوا شلاكة انتخبوا فضالة انتخبوا زبالة انتخبوا جاسمية انتخبوا الرعاش النفاش . انتخبوا الكلاش ابن الكلاش ، هذا بطل العراق وذاك حامي حمى الوطن وهذا الشريف ابن الشريف وهذا العفيف ابن العفيف ، نصير المحرومين وناصر المظلومين وهذا نصير الفقراء وهذا رافع الحيف عن المطلقات . وهذا هو الكظ صدام بالحفرة وذاك هو من قام بتطهير الجادرية وهذا هو الي  صلح الكهرباء وجاب الماي وجذب ودجل على هذا الشعب المسكين اللي جوعه صدام اربعين سنة وشبعه شعارات ،واجو الجماعة هم شايلين لوريات شعارت .
واحد يغتال الثاني باسم الديمقراطية .عمي منريد الديمقراطية ، انعل ابو الديمقراطية ، انتم شكول ديمقراطية . هي كوة احنا ناس تعودنا على اربع دبابات وبيان رقم واحد ، واخو اخيته ليفك حلكه ويكول اني .كلكم فلتوا ، جان عدنا ( بطل) واحد سلك اجدادنا . هسة الف بطل ، كلهم جانوا يم عماهم ولا واحد منهم فد يوم فتح حلكه و كال اني واني .
 معلينة نرجع لنور والفريق العراقي . من بدت اللعبة الى انتهت ،اني اعصابي متوترة مو من مستوى الاداء ، لا بالعكس الشباب ما قصروا، بس من ورا عليوي ابن جيرانه، قبل اللعبة بساعتين  وهو يرمي، خلص الشوط الاول وهو يرمي ،جابوا علينه هدف وهو يرمي، جابوا الثاني وهو يرمي . خلصت المباراة وهو يرمي ، صارت ضربات جزاء وهو يرمي . عليوي فتح علينه جبهة… طكت روحيو طلعت عليه ،
• عليوي  شنو القضية افتهمنا
• ها ، هم هاي ممنوع ، فرحانين ونرمي
• اي ماكو مشكلة بس الناس بطلت
• اني مابطل للصبح
• شعدك ابوك المدرب
• طب احسنلك بدون ثقافة ، بالله خلونا نعبر عن مشاعرنا
• عليوي اجوك جيش المهدي
• خل يجون كلهم عرف ونص عمامي
طبعا عليوي يجاوبني ويرمي .صدفة اجة ابو عليوي كلت الحمد لله ، راح نرتاح الرجال متدين وميقبل بهاي . ابو عليوي ضرب عليوي راشدي  واخذ من ايده البندقية وكام يرمي، ولحد الان ايها الاخوة اني كاعد اكتبلكم  وابو عليوي يرمي
احسن شي اتركم برعاية الله وعنايته واطلع اني هم ارمي .
 
 
 
]]> http://abdullasami.maktoobblog.com/27753/shalash-aliraqi/feed/